Manchester United heq dorë nga Jose Mourinho.

Ky është lajmi i bujshëm që përcjell gazeta britanike Mirror në faqen e saj dedikuar sportit.

Atëherë kur të gjitha mediat e jepnin të sigurtë uljen e Special One në stolin e Djajëve të Kuq duke filluar që nga sezoni i ardhshëm, Mirror lë gjithcka në pikëpyetje duke nënvizuar se pasuesi i Louis Van Gaal në drejtimin e United do të jetë zëvendësi e tij aktual dhe ish lojtari legjendar i kësaj skuadre, uellsiani Ryan Giggs.

Një nga arsyet që po i shtyn drejtuesit e klubit nga Old Trafford të heqin dorë nga Mourinho gjithmonë sipas gazetës në fjalë, ka të bëjë me faktin se portugezi nëse merr drejtimin e Manchester-it do të synojë të bëjë një merkato të fuqishme duke sjellur te United shumë lojtarë ekspertë, ndërsa filozofia e Djajëve të Kuq e përcakton qartë se Manchester-i duhet të besojë gjithmonë te talentet e reja.

Dicka të tillë vështirë se mund ta bëjë Mourinho që te cdo klub që shkon synon triumfet e menjëhershme duke blerë yje.

Ndërkohë nuk mund të thuhet e njëjta gjë për Ryan Giggs i cili ka shumë besim te Rashord me shokë dhe është i gatshëm tu japë shumë hapësira në formacion lojtarëve të rinj.

Mbetet për t’u parë nëse ajo që shkruan Mirror është e vërtetë. Do të jetë apo jo Jose Mourinho trajneri i ri i Manchester United këtë do të mësojmë vetëm pas përfundimit të këtij sezoni.