Llogaria ime
Veriu Portal
Revista

Është Shën Tereza e Kalkutës, Papa zbulon dekretin !
Publikuar me 04 Sht 2016

Është Shën Tereza e Kalkutës, Papa zbulon dekretin !

Shën Tereza e Kalkutës.

Kështu do të njihet nga sot e tutje bamirësja e madhe me origjinë shqiptare.

Para mijëra të pranishmëve në shesh, ku binin në sy flamuj të Shqipërisë dhe Kosovës, Nënë Tereza iu bashkua listës së shenjtorëve të Kishës Katolike.

Nga sot, data 4 shtator do të njihet si dita e festës së Shenjtes Terezë.

“Sot po ju dorëzoj këtë figurë emblematike! Ajo qoftë modeli juaj i shenjtërimit! Ndoshta do të jetë e vështirë ta thërrasim Shën, por Shënjtëria e saj është kaq pranë nesh! Një Nënë që u bë Shenjt!”.

Këto ishin disa nga fjalët e Papa Françeskut në cermoninë e shenjtërimit të Nënë Terezës në Vatikan. Ai përcolli mesazhe dhembshurie.

“Vullnetarët nuk presin as falenderime, as mirënjohje. Secili prej nesh mund të thotë se sikurse Zoti erdhi të më takojë kur kisha nevojë, ashtu edhe unë po eci drejt Tij dhe dua t’u shkoj në ndihmë atyre që kanë nvojë, familjeve në krizë, të sëmurëve, të burgosurve, të dobtëve, emigrantëve, minorenëve të braktisur, ashtu sikurse edhe të moshuarve”, deklaroi Papa Françesku.

“Kudo qoftë një dorë që kërkon ndihmë, aty duhet të jetë prania jonë, dora e Kishës që mbështet dhe dhuron shpresë. Nënë Tereza ka qenë bujare, duke mundësuar pranimin për të gjithë dhe të mbrojtes së jetës njerëzore. Ajo është përkul mbi përsona që ishin braktisur nëpër rrugë duke u njohur dinjitetin që u ka dhënë Zoti”, vijoi ai.

Ceremonia e sotme në Vatikan përmbyll rrugëtimin e Nënë Terezës drejt shenjtërimit, një rrugëtim i shkurtër për të, krahasuar me kohën që u është dashur shumë shenjtëve të tjerë, kohë që në disa raste ka kërkuar edhe 5 shekuj.

Ndërkohë, si për të shuar çdo dyshim dhe diskutim për prejardhjen e saj, lutja e parë në meshën e shenjtërimit u mbajt në gjuhën shqipe.

Si bëhesh ''Shënjt'' në Kishën Katolike
Ja kushtoi të gjithë jetën e saj të varfërve në Indi, kreu disa mrekulli dhe në 1979-ën, fitoi edhe një Nobel për paqen. Emri i Nënë Terezës njihet sot në të gjithë botën e Shenjterimi në Vatikan, ka tërhequr vëmendje të jashtëzakonshme.

Por çfarë është një shenjt dhe si mund të bëhesh i tillë? Shenjtor konsiderohet ai njeri që ka jetuar si katolik i devotshëm, i ka shërbyer Zotit e ka ndihmuar me altruizëm personat në nevojë. Shenjtët janë model për të tjerët dhe besohet se komunikojnë me Zotin në emër të atij që i drejtohet për ndihmë nëpërmjet lutjes. Në bindjen e katolikëve, të tillë janë njerëzit që kanë pasur një jetë të shenjtëruar e që tashmë, na vështrojnë nga parajsa.

Është gati e pamundur të përllogaritet numri i saktë i tyre. Një libër i quajtur “Jeta e Shenjtorëve” rendit 2,565 shenjtë katolikë, pa marrë parasysh me mijëra të tjerë që konsiderohen kështu në pjesë të ndryshme të botës.

Cilat janë hapat që hidhen drejt shenjtërimit?

Shumë prej shenjtëve nuk e kërkojnë shenjtërimin. Ata thjesht ia kushtojnë jetën detyrave humanitare dhe i jepen Zotit. Në disa raste, të mirat që bëjnë, Papa ua njeh pas vdekjes, fillimisht me lumturimin, e pastaj me kanonizimin. Por shenjt nuk bëhesh me një kërcitje të gishtave të drejtuesit të kishës katolike. Ekziston një procedurë e gjatë që duhet ndjekur, e që përcakton qartë se çfarë meritash ka vërtet kandidati dhe deri në ç’pikë duhet nderuar. Procesi ndonjëherë zgjat edhe për dekada të tëra e shekuj.

Së pari, klerikët lokalë shqyrtojnë veprat e kandidatit, jetën dhe shënimet e lëna me shkrim për prova të shenjtërisë së tij dhe virtytit të lartë. Nëse gjejnë material mjatueshëm, atëherë e paraqesin rastin në Vatikan, ku pritet verifikimi i një grupi kardinalësh e teologësh të Kongregacionit për Kauzat e Shenjtëve. Nëse Kongregacioni e jep pëlqimin e tij, çështja i dërgohet Papës.

Atit të Shenjtë i takon të vendosë nëse kandidati është i përnderuar, që do të thotë se ka pasur një jetë të mbushur me virtyte katolike. Hapi i radhës është lumturimi: njohja e faktit që individi ndodhet në parajsë.

Statusi jepet kur njëra prej mrekullive të tij verifikohet postmortum. Mrekullia duhet të lidhet domosdoshmërisht me lutjet e bëra kandidatit nga personi në nevojë. Mrekullitë studiohen me kujdes dhe pranohen si të tilla kur për to nuk ka asnjë shpjegim tjetër logjik.

Rruga drejt shenjtërimit duhet përforcuar pas kësaj me një mrekulli të dytë. Lumturimi i Nënë Terezës u bë tetorin e 2003-it nga Papa Vojtila. Një 30-vjeçare në Kalkuta tha atëherë se ishte shëruar nga kanceri në stomak falë lutjeve të drejtuara Nënë Terezës, ndërsa mjekët ngrinin supet, e nuk dinin sesi ta shpjegonin zhdukjen e sëmundjes.

Marsin e këtij viti, Papa Françesku njoftoi se murgesha e jashtëzakonshme do të shpallej shenjtore pas njohjes së një mrekullie të dytë, shërimin e një burri në Brazil, i cili vuante nga disa tumore në kokë. Ndonëse konsiderohej një rast i pashpresë, ai u shërua plotësisht pasi së bashku me njerëzit e vet të afërm, iu luten Nënë Terezës me zjarr.


1294
  
0

Mos perdorni komentet per te bere pyetje, mund te mos merrni pergjigje. Shkruaje pyetjen tende tek Pyetje dhe Pergjigje

Sa bejne dy plus dy? (shkruaje me germa rezultatin)
EMRI