Basha: Nesër themelojmë 'Republikën e Re', çadra nuk mbyllet

Këtë të shtune në ora 12:00, siç edhe është njoftuar, opozita do zhvillojë në Bulevardin Dëshmorët e Kombit para kryeministrisë një protestë të madhe për kauzën e zgjedhjeve.

Duke folur para protestuesve në çadër për tubimin e së shtunes, kryetari i opozitës, Lulzim Basha, tha se dita e shtunë do të jetë historike, pasi shqiptarët do të themelojnë Republikën e Re.

“12 javë protestë do të përmbyllen sot, pasi nesër nisim rrugëtimin për Republikën e Re dhe rrëzimin e Republikës së Vjetër. Nesër shpresa merr rrugën për zgjidhjen e problemeve të shqiptarëve.
Nesër bashkohen të gjithë në këtë shesh për të përmbysur Republikën e Vjetër. Nesër bashkohen në shesh qindra mijëra të rinj. Do të bashkohemi në këtë shesh si kurrë më parë. Nesër nis rrugëtimi i bashkimit të shpresave të çdo shqiptari të ndershëm, i besimit të patundur në të ardhmen më të mirë që na pret, i vendimit të madh për të rrëzuar me forcën e bashkimit nga themelet republikën e vjetër të vesit, korrupsioni, krimit e drogës të pazareve të ndyra politike, republikën e vjetër të kupolës së vjetër politike që luajti gjithë këto vite teatrin e ndyrë në kurrizin e shqiptarëve dhe për të themeluar që nesër republikën e qytetarëve shqiptarë, etj. Republika e re do të çliroje biznesin e vogël dhe i jep zgjidhje papunësisë, pensioneve të vogla, studentëve të zhgënjyer nga reforma në arsim.

Kauza për zgjedhje të lira dhe të ndershme dhe premtimi i republikës së re ku fatin e keni ju në dorë, janë arsyet që me bekimin e Zotit të madh do t’i mbledhë nesër shqiptarët që nuk ka krim drogë ta ndalë”, tha Basha.

Çadra nuk mbyllet

Daljen e pasdites në çadren e protestës Basha e shfrytëzoi edhe për të përgënjeshtruar thashethemet e përhapura për mbylljen e çadres.

“E kanë merak kundërshtarët, po nuk do mbyllet çadra deri në fitoren totale pa kompromis të kauzës së zgjedhjeve të lira dhe të ndershme, deri në vendosjen e Republikës së Re”,- tha lideri i opozitës.

Përditësuar me 12 Maj 2017