Atentati në Gjirokastër: Zbardhet skema e shpërthimit të telekomanduar që i mori jetën Beqir Devollit

Detaje të reja kanë dalë në dritë në lidhje me ngjarjen e rëndë që tronditi Gjirokastrën, ku një shpërthim me lëndë eksplozive i mori jetën shtetasit Beqir Devolli, i njohur ndryshe si “Çilo”, si dhe la të plagosur shokun e tij, Erigers Mela. Nga të dhënat e para të grupit hetimor, rezulton se mekanizmi i këtij krimi ishte i mirëorganizuar dhe i ndjekur hap pas hapi nga autori.

Autori i atentatit e ka ndjekur objektivin e tij në distancë për rreth 3 kilometra, duke filluar nga zona e Viroit e deri në vendin ku ndodhi shpërthimi. Pasi viktima ka pirë kafe me shokun e tij dhe është futur brenda në automjet, lënda plasëse është aktivizuar përmes një telekomande në distancë. Përpara se të kryente shpërthimin, personi që kishte në dorë telekomandën ka pritur me kujdes që rruga përreth të zbrazej nga kalimtarët ose mjetet e tjera.

Hetimet e mëtejshme kanë zbuluar se Devolli dhe pasagjeri Mela kishin marrë telefonata kërcënuese kohët e fundit. Ky i fundit kishte marrë një paralajmërim edhe vitin e kaluar, kur iu dogj makina. Ndërkohë, viktima kishte një të kaluar me drejtësinë, pasi kishte qëndruar për dy vjet nën masën e "arrestit në shtëpi" në Tiranë. Aktualisht, grupi hetimor po verifikon me shumë përparësi pistën nëse ky atentat ka lidhje me vrasjen e Artan Myrtajt, ngjarje e ndodhur dy javë më parë në qytetin e Sarandës.