Inter, pronaret e rinj premtojne 3 blerje ne janar

Rosan Roeslani Perkasa, një nga dy ortakët e Erick Thohir që do të marrin së bashku paketën e mazhorancës së aksioneve zikaltër, bëri të ditur planet e pronarëve të rinj për të ardhmen e Interit.

Ai garantoi blrejen e lojtarëve të mëdhenj që në janar si dhe një projekt afaktgjatë duke u shprehur: “Erick Thohir do të qëndrojë te Interi për shumë kohë, i pëlqen historia dhe familja zikaltër, dhe i ka premtuar Interit se do të krijojë një klub edhe më të fortë.

Ne do të bëhemi zyrtarisht pronarët e rinj të Interit në 15 nëntor, anëtarët e këshillit administrativ do të jenë tetë, 5 na përkasin ne ndërsa 3 zgjidhen nga Moratti.

Nuk është e vërtetë që ka një opsion për riblerjen e klubit nga familja Moratti, pasi 70 përqëindëshi ynë i kuotave mbulon të gjitha asetet e Interit përfshirë këtu dhe qendrën sportive Apiano Gentile”.

Për sa i përket merkatos Roeslani dha një lajm vërtet entuziazmues për tifozët zikaltër duke deklaruar se pronarët e rinj do të blejnë që këtë sezon një deri në 3 lojtarë të mëdhenj në mënyrë që skuadra të arrijë një ndër vendet e para të klasifikimit që garantojnë pjesëmarrjen në Champions League.

Për sa i përket kapitenit Zaneti, Roeslani u shpreh se argjentinasi do të bëhet pjesë e stafit menaxhues të Interit sapo të tërhiqet nga futbolli, Morati do të vazhdojë të qëndrojë president edhe për një ose dy vjet të tjerë, ndërsa do të vlerësohet pozicioni i drejtorit të merkatos Branka që sipas tij ka shitur disa futbollistë të rinj të shkëlqyer që kanë potencialin për tu bërë të mëdhenj në të ardhmen.