Inter, ikën trajneri por vjen një drejtor i ri teknik

Stefano Pioli shkarkohet nga drejtimi i Interit kur kanë mbetur edhe 3 javë nga mbyllja e kampionatit.

Klubi zikaltër e komunikoi largimin e trajnerit italian nëpërmjet një komunikate për shtyp, ku e falenderonte Piolin për punën e bërë në skuadër gjatë 6 muajve të qëndrimit të tij në stol.

Për 3 ndeshjet e mbetura në Serinë A, skuadra e Interit do të drejtohet nga Stefano Veki, ndërkohë që drejtuesve të klubit tashmë u duhet të përshpejtojnë hapat për gjetjen e trajnerit të ri.

Ndërkaq, Interit do t'i bashkohet Valter Sabatini, i cili do të jetë në rolin e drejtorit teknik të skuadrës.

Walter Sabatini pritet pritet të vijë në klubin zikaltër, që nga dita e nesërme dhe besohet se do të jetë drejtuesi që "Suning" do t'i besojë organizimin e klubit, për sezonin e ardhshëm dhe në vijim.

Sabatini është një adhurues i punës së Luciano Spalletit, ndaj trajneri aktual i Romës pritet të sponsorizohet si trajner i ardhshëm zikaltër.

Ende nuk dihet nëse njeriu i merkatos te Inter, Piero Ausilio, do të vazhdojë të qëndrojë akoma në detyrë, sepse kontrata i mbaron në qershor dhe ardhja e Sabatinit duket se i mbyll derën rinovimit me të.

Ndërkohë dalin detaje të reja mbi shkarkimin e Stefano Piolit, tre javë para fundit të sezonit. Zikaltrit duket kanë mësuar mbi një para-marrëveshje të Piolit për të drejtuar Fiorentinën, nga sezoni i ardhshëm dhe nuk ju ka pëlqyer aspak kjo sjellje e ish-trajnerit.

Gjithashtu, mediat italiane hedhin hipotezën se mund të ketë qenë pikërisht Sabatini, ai që ka kërkuar ndërprerjen e menjëherëshme të marrëdhënies me trajnerin Pioli.

Kohët e fundit, Inter është kthyer në një kantier të hapur, pasi krahas përforcimit të ekipit me futbollistë të tjerë, pritet edhe një rinovim i stafit, në nivel drejtues.

Kështu, krahas Sabatinit, Lele Oriali është një tjetër ish drejtues, që pritet t'i bashkohet projektit të ardhshëm të Interit, ndërsa për drejtimin e ekipit po synohen trajnerë me peshë si Conte dhe Simeone.