Cfarë ndodh pas dyerve të mbyllura?

Qeveria re e cila pritet të marrë detyrën në fillim të këtij muaji u mblodh dje në qytetin e Shkodrës për të dytën herë radhazi. 

Në një mbledhje që zgjati katër orë nuk pati as katër minuta komunikim median, ndërsa ai pak informacion që qarkullon si telefon i prishur nga njëra media në tjetrën është i përgjithshëm dhe i njëllojtë. 

Të gjitha mediat flasin me gojën e një burimi pranë stafit të Ramës, sipas të cilit mbledhja bëhet për 300 ditët e para të qeverisjes dhe çdo ministër po paraqet e planet e tij të punës. 

Ndoshta stafi i Ramës nuk e ka parë të arsyeshme të thotë se çfarë konkretisht u diskutua, cilat do të jenë prioritetet e këtyre 300 ditëve, cili ministër ka një plan pune, cili nuk e ka, ata që e kanë çfarë kanë parashikuar të bëjnë? 

Nga pikpamja mediatike qeveria “Rama” deri më tani po bën lajm vetëm për vendndodhjen e mbledhjeve, ndërsa për publikun ka vetëm imazhin se kjo qeveri mezi po pret të marrë detyrën, aq sa nuk humb kohë, por disa punë po i bën para se të nisë punën. 

Sot (e martë) është dita e dytë e mbledhjes maratonë në Shkodër, ku mediat me një vemendje të justifikuar kërkojnë më shumë “miell” për lajmin. Në pritje të transparencës, për hir të transparencës kamerat rrinë tek Hotel Coloseu.