Nis ndërtimi i Xhamisë së madhe të Tiranës

Është inaguruar sot vendosja e gurit të parë në xhaminë e Namazgjasë. Xhamia do të ngrihet në sheshin e Namazgjasë. Kryetari i Komunitetit Mysliman, Selim Muça, e ka konsideruar këtë ditë si një ditë historike jo vetëm për besimtarët myslimanë, por për mbarë shqiptarët kudo që janë.

“Fillimi i punimeve për ndërtimin e Xhamisë së madhe të Tiranës është një ngjarje historike. Namazgjaja ku jemi sot është shprehje e shpirti të madh e bujar e atyre besimtarëve myslimanë që dhanë për fenë e popullin.

E lus zotin e lartësuar të na e lehtësojë punën tonë në të gjithë proceset e punës për nderimin e xhamisë së madhe”, tha Muça në ceremoni.Kryeministri i vendit, Sali Berisha, tha se sot u vendos në vend një e drejtë e mohuar për 20 vjet.

“Për Tiranën, Shqipërinë dhe shqiptarët kjo ditë është dita e lindjes së profetit Muhamed, burrit që së bashku me Jezu Krishtin dhe Budën i dhanë tokës kuptimin e madh të zotit, kjo është dhe do mbetet një ditë e madhe e rëndësishme, ditë në të cilën ne inaugurojmë ndërtimin e xhamisë më të madhe, të kryeqytetit dhe vendit në tërë historinë e tij.

Kjo ngjarje është e madhe edhe në një aspekt tjetër. Sot ne ndahemi nga qëndrimet paragjykuese, të inspiruara nga ateizmi dhe ideologjitë e tij, të cilat penguan për 20 vjet ndërtimin e kësaj xhamie kaq shumë të domosdoshme për besimtaret myslimanë në Tiranë, por edhe si një detyrim i madh për të rivendosur të drejta të shkelmuara në vendin që meritojnë.

22 vjet më parë me themelimin e partisë së parë opozitare ne shpallëm si parim themelor që aty ku janë, aty ku jetojnë 4 të krishterë të ndërtohet një kishë, aty ku janë 4 myslimanë një xhami, aty ku janë 4 bektashinj një teqe. Ne shpallëm respektin e palëkundur ndaj feve”, tha kryeministri.

Ndërsa kryebashkiaku Lulzim Basha fillimin e ndërtimit të kësaj xhamie e konsideroi një premtim të mbajtur të Bashkisë së Tiranës për një objekt që tashmë i kishte ardhur koha të kompletonte mozaikun e objekteve të kultit në kryeqytet.

“Besimi dhe dashura na sollën deri këtu, për mua besimi që më dhanë qytetarët ishte celësi për bashkëpunim me këtë komunitet dhe gjithë faktorët e tjerë që bënë të mundur fillimin e punimeve. Tirana është model i bashkëjetesës fetare.

Koha kishte ardhur që edhe xhamia e madhe të ishte realitet në Shqipëri, Ndjej keqardhje për kohën e gjatë që kemi humbur. Por sot kompletojmë mozaikun e objekteve të kultit dhe shënojmë një premtim të mbajtur para këtij komuniteti dhe zotit të madh”, tha ai.