Ndahet nga jeta në moshën 50-vjeçare Kimmarie Johnson, aktorja e "Beverly Hills"

Bota e kinematografisë amerikane mban zi për Kimmarie Johnson, aktoren dhe modelen e njohur për rolin e saj në serialin kult Beverly Hills 90210. Aktorja u nda nga jeta të mërkurën, më 4 nëntor 2026, në moshën 50-vjeçare në spitalin "Cedars-Sinai" në Los Angeles, pas një urgjence të rëndë kardiake të shkaktuar nga një aneurizëm në zemër. Lajmi u bë i ditur publikisht nga mbesa e saj, Rhonda Scott.

Përpara se të bëhej pjesë e ekranit të vogël, Johnson e nisi karrierën në botën e modës, duke fituar titullin "Miss Pennsylvania USA" në vitin 1992, gjë që e shtyu të shpërngulej në Los Angeles. Publiku e kujton atë kryesisht për rolin e "Judy" në sezonin e tetë të Beverly Hills 90210 (në epizodin e vitit 1998 "The Following Options"), si dhe për pjesëmarrjen në filmin komedi të vitit 2000 Dude, Where's My Car? së bashku me Ashton Kutcher. Pas lindjes së djalit të saj, Cameron Nino, ajo u tërhoq gradualisht nga aktrimi për t'iu përkushtuar familjes dhe biznesit të saj të kozmetikës "SkinGlow".

Vdekja e saj e parakohshme ka rikthyer vëmendjen te ajo që fansat e quajnë "maledizione" (mallkimi) i serialit Beverly Hills 90210, për shkak të humbjeve të shumta të anëtarëve të kastit përgjatë viteve, si Luke Perry në vitin 2019 dhe Shannen Doherty në korrik të vitit 2024.