Llogaria ime
AOL Portal
Lajme
Sulmi kibernetik, Europol: Goditje e paprecedentë, propozohet hetim ndërkombëtar

Sulmi kibernetik që goditi organizata në mbarë botën ka qenë në një shkallë të paprecedentë.

Kështu ka deklaruar agjencia policore europiane Europol, që ka bërë thirrje për një hetim të detajuar ndërkombëtar, me qëllim identifikimin e fajtorëve.

Në të paktën 75 mijë kompjutera në 99 vende të botës mbërritën kërkesa për pagesë në këmbim të lejimit të aksesit dhe riparimit të shërbimeve.

Vende europiane, por edhe Rusia, ishin ndër më keq të prekurat. Edhe pse përhapja e virusit, i njohur si “Dua të qaj” dhe variante të tjera me këto fjalë, duket se është ngadalësuar, kërcënimi nuk ka kaluar ende.

Europol deklaron se njësia kundër krimit elektronik EC3 po punon ngushtë me vendet e prekura, me qëllim reduktimin e kërcënimit dhe asistimin e tyre.

Në Britani, të paktën 48 institucione të kujdesit shëndetësor u prekën nga sulmi që nisi ditën e premte. Deri tani, vetëm 6 prej tyre janë kthyer në normalitet.

Ndërsa në Rusi janë prekur përkohësisht hekurudhat dhe institucionet bankare. Në Gjermani, operatori federal hekurudhor u çorodit, ndërsa në Francë, prodhuesi i automjeteve “Renault” u detyrua të ndalë prodhimin në disa fabrika të tij.

Në Spanjë, kompani si Telefonica dhe Gas Natural u prekën nga sulmi. Në SHBA, viktimë ra kompania postare FedEx. Ndërsa në Kinë, Indonezi dhe Korenë e Jugut shkollat dhe spitalet.

Ndërkohë, NATO ka deklaruar se i ka shpëtuar këtij agresioni. “Nuk kemi prova që të jenë sulmuar sistemet tona”, dekalroi sekretari i përgjithshëm Jens Stoltenberg.

Ai bëri me dije se, një ditë më parë Aleanca njoftoi aleatët përmes kanaleve të saj të komunikimit për intensifikimin e sulmit.

Eksperti 22-vjeçar: Një tjetër sulm kibernetik, i pashmangshëm

Pas sulmit global kibernetik të së premtes, që infektoi më shumë se 125 mijë sisteme kompjuterike, ekspertët e sigurisë kanë paralajmëruar se një tjetër sulm masiv është i pashmangshëm.

Një studiues britanik i sigurisë, i identifikuar si “MalwareTech”, i cili ndihmoi në kufizimin e sulmit nga i ashtuquajturi “Ransomware”, parashikon se një tjetër sulm është në prag, ndoshta duke nisur nga e hëna e javës së ardhshme.

“MalwareTech”, i cili kërkon të ruajë anonimatin, është lavdëruar si një “hero rastësor”, pasi arriti të regjistronte një domain për të ndjekur përhapjen e virusit, e që përfundoi me ndalimin e tij. 22-vjeçari tha për BBC-në se “është tejet e rëndësishme që njerëzit të riparojnë sistemet e tyre kompjuterike tani.

“Arritëm ta ndalnim këtë sulm, por do të ketë një tjetër të tillë së shpejti dhe nuk do të mund të ndalet më prej nesh. Janë hedhur shumë parà në këtë fushatë dhe nuk ka asnjë arsye për ata që të ndalen. Nuk do ndonjë përpjekje të veçantë nga ata që të ndryshojnë kodin dhe t’ia nisin nga e para sërish. Kështu që ka shumë gjasa që ata të veprojnë përsëri, ndoshta jo këtë fundjavë, por duke filluar nga mëngjesi i së hënës”, tha 22-vjeçari.

Të dielën, ai paralajmëroi se piratët kompjuterikë mund ta përmirësojnë virusin dhe të eliminojnë ndryshimin që ndihmoi në pengimin e përhapjes së mëtejshme të virusit. “Versioni fillestar i WannaCrypt ishte i ndalshëm, por nëse nxjerrin versionin 2.0, atëherë nuk do të mund të ndalet. Ju mund të jeni të sigurtë vetëm nëse riparonin sistemet sa më shpejt”, shkroi ai në Twitter.

Përditësuar me 14 Maj 2017

Mos perdorni komentet per te bere pyetje, mund te mos merrni pergjigje. Shkruaje pyetjen tende tek Pyetje dhe Pergjigje

Sa bejne dy plus 1? (shkruaje me germa rezultatin)
EMRI
Jeni të kënaqur me masat e marra për Koronavirusin