Anulimi i zgjedhjeve në Kavajë, Basha: Fitorja e parë e 'Republikës së Re'

Anulimi i zgjedhjeve në Kavajë përmes tërheqjes së kandidatit të PS nga kryeministri Rama është përshëndetur nga të gjithë aktorët politikë, përfshirë presidentin Nishani dhe Ambasadën Amerikane.

Por në kampin e opozitës tërheqja e Ramës është cilësuar si fitore domethënëse për kauzën e tyre për një ''Republikë të Re'' dhe zgjedhje të lira.

Kreu i PD-së, Lulzim Basha, pasi u rikthye në çadrën e lirisë pas lajmit, tha se kryeministri dështoi të instalonte monizmin sërish.

“Dështoi plani i Ramës për të rikthyer monizmin në vendin ku nisi rrëzimi i diktaturës. Dua të falënderojë nga zemra ata qindra mijëra demokratë luftëtarë të lirisë. Të cilët me qëndresën e tyre u bënë një barrierë e pakapërcyeshme për planet ogurzeza të mafies dhe krimit. Kjo ishte fitorja e parë e Republikës së Re”, - u shpreh kreu i PD-së, Lulzim Basha.

Ndërkohë pranë Lulzim Bashës bëjnë të ditur se protesta e opozitës me 7 maj në Kavajë do të zhvillohet edhe pse Rama u tërhoq nga zgjedhjet.

Basha njoftoi gjithashtu e javën e ardhshme do të ketë një protestë të madhe në Tiranë dhe më pas ato do të shtrihen edhe në rrethe.

Last updated 3 mins ago