Llogaria ime
AOL Portal Sport

Lopetegui: Shqipėria skuadėr e madhe por nuk e kemi frigė


Julen Lopetegui, trajneri i Spanjës, së bashku me mesfushorin Thiago Alcantara dhe portierin De Gea dolën në konferencën për mediat një ditë para ndeshjes që do të zhvillohet në “Loro Boriçi” ndaj Shqipërisë.

Nga ana e tij Lopetegui ka vetëm vlerësime për Shqipërinë.

Në konferencën për shtyp përpara ndeshjes, trajneri i Spanjës shfaqi respekt për kuqezinjtë, duke vlerësuar rritjen e skuadrës së Gianni De Biasit.

“Kemi gjithmonë presionin se duhet të luajmë për të fituar. Tashmë përballemi me Shqipërinë, që është shndërruar në një skuadër të madhe dhe e ka merituar vendin e saj në finalet e Euro 2016 dhe në krye të këtij grupi. Shqipëria është një ndër skuadrat që është rritur më së shumti në vitet e fundit në Europë dhe e treguan gjatë edicionit të kaluar, duke fituar në Portugali.

A i trembemi rivalëve?

Nuk i trembemi asnjë kundërshtari, por kemi vetëm respekt profesional. Është një respekt i futuar nga ekipi shqiptar, ndeshje pas ndeshje. Shqipëria është një skuadër mjaft konkurruese në të gjitha aspektet dhe me lojtarë mjaft cilësorë”.

Drejtuesi i stolit të La Rojas nuk preferoi të bënte komente terrenin në “Loro Boriçi”, me spanjollët që prej ditësh kanë shprehur shqetësim se gjendja e fushës mund të ndikojë në paraqitjen e tyre.

“Terreni është ai që është dhe nuk mund të bëjmë asgjë. Por, ajo që mund të bëjmë është të impenjohemi maksimalisht në fushën e lojës”.

Lopetegui nuk preferoi të jepte detaje për formacionin me të cilin Spanja do të luajë ndaj Shqipërisë, ndërsa komentoi edhe grupin kualifikues drejt finaleve të Botërorit 2018.

“Luajtëm me Italinë vetëm 48 orë më përpara dhe kjo ka ndikuar në lodhjen e lojtarëve, pavarësisht se këta janë profesionistë të mësuar të luajnë çdo tre ditë. Jam i kënaqur nga paraqitjet e skuadrës, loja e shfaqur dhe rastet e krijuara për gol. Do të shohim gjendjen e skuadrës deri në momentet e fundit dhe më pas do të vendosim se çfarë formacioni do të hedhim në fushë. Ndaj Shqipërisë sfidë vendimtare për grupin? Ky do të jetë një grup i luftuar deri në fund të kualifikueseve. Megjithatë nuk duhet të harrojmë që na ndajnë edhe dy vjet nga Kupa e Botës”.

Alcantara dhe De Gea
Thiago Alcantara dhe David De Gea ishin yjet spanjollë të pranishëm në konferencën për shtyp përpara sfidës me Shqipërinë. Fantazisti i Bayern Munchen ishte më konkret rreth duelit në Shkodër, duke konfirmuar se iberikët i kanë studiuar dhe i vlerësojnë maksimalisht kuqezinjtë.

“Në ditët e sotme, niveli është rritur dhe nuk rivalizojnë vetëm skuadrat e mëdha, por të gjithë kundërshtarët mund të të surprizojnë. Ky është edhe rasti i Shqipërisë, një skuadër e kthyer në shembullin e përparimit të futbollit. Si do të luajmë? Skema taktike mbetet brenda skuadrës, por i kemi studuar kundërshtarët, si ndryshon ekipi shqiptar në fushën e lojës, me tre mesfushorë që ndihmojnë mbrojtjen apo me rreshtimin e tyre me pesë mesfushorë”.

Spanja paraqitet në Loro Boriçi pas barazimit 1-1 ndaj Italisë, me golin e pësuar në minutat e fundit të supersfidës. Por, ndërsa Thiago Alcantara tha se “futbolli nuk është asnjëherë i drejtë”, megjithatë pika e marrë në Itali “është një rezultat mjaft i vlefshëm”, portieri David De Gea u përqendrua te kritikat ndaj sulmuesit Diego Costa.

“Diego Costa nuk është agresiv. Kjo është mënyra e tij e lojës, si në përfaqësuese ashtu edhe në klub. Nuk duhet të harrojmë kontributin që ai i jep përfaqësueses spanjolle. Gabimi i Buffon? Mund ti ndodhë gjithkujt. Megjithatë nëse në Spanjë të kritikojnë pas dy gabimeve, në Gjermani dhe Itali lojtarët janë më të vlerësuar”.


Tags:
Lexuar 427 here / Marre nga Supersport.al


Kush eshte favorit per Boterorin 2018